GAILLIMH – Seolfaidh Sheila Garrity, a bhí go mór chun cinn i bhfeachtas Catherine Connolly don Uachtaránacht, a feachtas féin do shuíochán Ghaillimh Thiar a d’fhan folamh tar éis bhua Chonnolly. Beidh an seolaadh ar siúl Dé Domhnaigh, an 18 Eanáir, ó 4–6 i.n. sa Slatehouse Bar i mBusker Brownes, Lána Kirwan.
Ní mór fothoghchán chun an suíochán sa Dáil a líonadh a reáchtáil faoin 11 Bealtaine, nó laistigh de shé mhí ó ghlac Connolly leis an Uachtaránacht an 11 Samhain seo caite. Sa tríú téarma a bhí Connolly ag freastal mar TD neamhspleách i nGaillimh Thiar go dtí gur toghadh í mar dheichiú hUachtarán na hÉireann i mí Dheireadh Fómhair seo caite, agus í ag fáil níos mó ná 63% den vóta.
Ba léachtóir í Garrity in Ollscoil na Gaillimhe le fada an lá agus is Ollamh Comhlach le hOideachas Luath-Óige í faoi láthair in Ollscoil Chathair Bhaile Átha Cliath (DCU). Ba í an comhordaitheoir ar fheachtas Chonnolly i gCathair na Gaillimhe, ag canbhásáil go forleathan agus ag eagrú imeachtaí. Ag an gcruinniú feachtais deiridh i mBóthar na Trá, thug sí óráid inspioráideach faoi aontú na heite clé chun polaiteoirí ón eite dheis a dhéanann ceap milleáin de lucht an mhionlaigh agus na hinimirce a choinneáil siar.
“Le breis agus 20 bliain anuas, tá mé ag obair leis an bpobal, le hoibrithe deonacha agus le gníomhaithe áitiúla chun tacú leis na cúiseanna, na feachtais agus na hiarrthóirí a léiríonn na luachanna a gcreidim féin iontu. Táim mo chur féin chun tosaigh anois, den chéad uair mar iarrthóir, mar ba mhaith liom leanúint leis an obair sin — go díreach, go hoscailte, agus le muintir Ghaillimh Thiar i gcroílár gach rud,” ar sí.
“Tosaíocht shimplí atá agam: is iad riachtanais mhuintir Ghaillimh Thiar an phriaracht. Ba cheart gach cinneadh a mhúnlú de réir cothroime, dínite, agus tuisceana ar shaoil réalaíocha ár bpobal éagsúil — ar na hoileáin, sna sráidbhailte agus sna bailte, agus inár gcomharsanachtaí uirbeacha. Mar iarrthóir neamhspleách, níl mé faoi cheangal ag aon pháirtí polaitíochta ná ag aon pháirtithe leasmhara eile — ní fhreagraím ach do mhuintir Ghaillimh Thiar agus troidfidh mé ar a son, chun caighdeán bheatha gach duine i nGaillimh Thiar a fheabhsú.”
Roimh ghairm fhoirmiúil an toghcháin, beidh Garrity ag óstáil sraith cruinnithe pobail ar fud an toghcheantair, ag bualadh leis an bpobal agus ag éisteacht leo chun tuiscint níos fearr a fháil ar cheisteanna áitiúla ó pheirspictíocht na ndaoine áitiúla. Tá eolas faoi na himeachtaí atá le teacht ar fáil ag garrityforgalway.ie nó trí leathanaigh meán sóisialta an fheachtais.